Stjernene starta på UKM

Mange av dei mestseljande musikarane i Noreg deltok i Ungdommens Kulturmønstring (UKM). Odd Nordstoga, The Blacksheeps, Gåte og Jaga Jazzist er nokre av dei mest kjende.

− UKM synst eg er eit fantastisk arrangement, der ungdom får vist seg fram frå ulike sider, noko eg synst er viktig. Også det å få opptre for eit rimelig stort publikum er fantastisk å ta med seg vidare, seier Tone

Damli Aarberge til ukm.no. Til saman deltok ho fire gonger på UKM, alle gongane med fleire innslag.

Merkeleg Michael Jackson-blanding
Teater- og filmskodespelar Ingrid Bolsø Berdal, kjent frå Fritt Vilt-filmane, har delteke tre gonger i UKM med musikk.

– Første gong eg var med var då eg gjekk i 8. klasse på ungdomsskulen og framførte eit mildt sagt merkeleg nummer der eg kombinerte musikk av den svenske artisten Cecilia Vennersten og Michael Jackson, fortel Ingrid Bolsø Berdal til ukm.no.

Debuterte som sjuåring
Den no nedlagte gruppa Gåte spelte første offentleg på UKM. Då var vokalist Gunnhild Sundli berre ni år gamal. Storebror Sveinung Sundli var endå yngre då han deltok i UKM. Som sjuåring spelte han fiolin, og har sidan vore på dei fleste av kulturmønstringane i Orkdalen. Han meiner til og med å hugsa at han har delteke med kunstverk òg ein gong.